喺努力读书之余相信各位DSE同学都喺度物色紧心水嘅大学学位。
过去嘅经验话俾我哋知大部份嘅同学唔系成绩唔够好，而系因为拣错科搞到冇U读。我哋希望每个同学都可以揾到合适嘅学科，减低资源错配，而信息就系胜负嘅关键。

有见及此，我哋会喺度提供大学课程嘅数据，包括课程简介、收生人数、面试要求、入学成绩等等。
我哋仲特别提供评估系统，只要输入你嘅DSE学科同估计成绩，我哋就可以话你知
(1)你系咪符合每一科嘅入学资格， 同埋
(2)用往年嘅入学成绩评估入学机会。

如果你对呢个APP有任何意见，欢迎去Facebook Page留言。喺呢度希望大家都入到心仪嘅学科啦！
------------------
日前我哋收到JUPAS嘅律师信，得悉APP内唔可以出现佢哋嘅注册商标(包括图示，同埋JUPAS一字)，亦都唔可以有"unauthorised link" 连去JUPAS网页，据称转载各大院校提供嘅课程数据亦系侵犯咗JUPAS嘅版权。同时或者由于本APP设计过于精美，部份地方曾经出现过JUPAS一字，有人认为呢个APP会被误会系由JUPAS官方提供。基于以上理据，对方希望我哋将呢个app下架。

喺呢度我哋郑重声明，呢个APP嘅设计人员同JUPAS绝无关系。呢个绝对唔系官方app。为免不必要嘅误会，我哋已经将JUPAS相关嘅信息悉数删除。连APP名都唔再有JUPAS呢个字。
如果因为版本问题而家仲见到旧有嘅logo/功能，请大家尽快update做最新版本。
关于下架一事，由于app内已经冇属于JUPAS商标/版权嘅内容，我相信对方无权要求我哋下架。

就今次JUPAS发律师信一事，我哋深表遗憾。
作为官方机构，理应重视学生利益。近日所有下架嘅网页/APP，目的都系喺公平使用嘅原则下，补充网页嘅不足，增加信息流通性，减低考生因为转制而要承受嘅风险同压力。
施加压力去阻止呢啲工具流通，对学生当然有损，但系对JUPAS方面到底有咩益处？
如果真系有闲钱，点解唔用笔钱去做啲更加有意义嘅事，例如谂吓点样增加选科嘅透明度，或者自己整个official app俾考生呢？

我哋明白版权嘅重要性，所以由一开始我哋都唔系将所有信息搬字过纸，而系将院校提供嘅重要内容抽丝剥茧，分析编排。
不过JUPAS一方对「版权」一词理解异常严苛，连加一条 hyperlink 都要 "authorisation"，就算我哋有千百个IDEA，相信都冇办法加落呢个APP度喇。

另外呢个app其实系可以offline用嘅，我哋并冇收集任何用户数据(包括预测成绩，使用数据，浏览记录等等)。

Dendrite Solutions团队敬上